खासदार संजय दिना पाटील यांनी पत्रकारांबाबत वापरलेल्या अवमानकारक भाषेमुळे पत्रकारांच्या भावना दुखावल्या गेल्याचा आरोप संघटनेने केला आहे.
संघटनेच्या निवेदनानुसार, २५ जून रोजी पत्रकारांशी संवाद साधताना खासदारांनी पत्रकारांविषयी आक्षेपार्ह शब्दांचा वापर केल्याचे सांगण्यात आले.
या वक्तव्यामुळे पत्रकारांमध्ये तीव्र नाराजी व्यक्त होत असून, पत्रकारांचा सन्मान व अभिव्यक्ती स्वातंत्र्याला धक्का पोहोचल्याची भावना निर्माण झाली आहे.
पत्रकार हे समाज आणि प्रशासन यांच्यातील महत्त्वाचा दुवा असून जनतेच्या समस्या शासनापर्यंत पोहोचविण्याचे कार्य करत असतात.
अशा परिस्थितीत लोकप्रतिनिधीकडून पत्रकारांविषयी अपमानास्पद भाषा वापरणे खेदजनक असल्याचे संघटनेने म्हटले आहे.
गर्जना महाराष्ट्र ग्रामीण पत्रकार संघटना, जळगाव जिल्ह्याच्या वतीने खासदार संजय दिना पाटील यांच्या वक्तव्याचा निषेध नोंदविण्यात आला असून, संबंधित प्रकरणाची चौकशी करून योग्य ती कारवाई करण्यात यावी, तसेच त्यांनी पत्रकारांची जाहीर माफी मागावी, अशी मागणी करण्यात आली आहे. यासोबतच पत्रकारांच्या सुरक्षेसाठी प्रभावी उपाययोजना करण्याचेही निवेदनात नमूद करण्यात आले आहे.
यावेळी संस्थापक अध्यक्ष नरेंद्र कदम, संस्थापक सचिव भगवान सोनार, संस्थापक खजिनदार ललित खरे, जिल्हाध्यक्ष चेतन वाणी, जिल्हा कार्याध्यक्ष हेमंत पाटील, शहराध्यक्ष जितेंद्र कोतवाल यांच्यासह अनेक पत्रकार उपस्थित होते.
0 Comments